“Qəbələ”nin futbolçusu Ürfan Abbasov Azərbaycan milli komandasında ilk oyununu keçirib.
İdmanxeber.com-un məlumatına görə, gənc futbolçu öz debütü barədə fikirlərini bildirib.
Abbasov açıqlamasında bu fikirləri səsləndirib: “Moldova ilə oyunda rəqibdən daha yaxşı oynadıq. Bunun nəticəsində daha çox qol imkanlarımız da oldu. Moldovanın zəif komanda olduğunu da demək olmaz. Oyun bizim istədiyimiz kimi alındı. Milli komandada oynamaq qürurverici hissdir. Debütümə görə mənə şans verən baş məşqçiyə təşəkkür edirəm. Moldova ilə matç yığmada ilk oyunum idi. Qarşıdakı oyunlarda etimad göstərilsə, özümü daha yaxşı göstərəcəyəm. Daim milliyə çağırılmaq üçün klubda da həmişə çıxış etmək lazımdı. Bunun üçün çox çalışmaq lazımdır. Mən də bundan sonra üzərimdə daha da çox çalışacağam”.
"Qəbələ"nin futbolçusu Premyer Liqadakı son vəziyyətləri və "Sumqayıt"la keçirəcəkləri matç barədə də danışıb: “Son turlarda keçirdiyimiz oyunlar istədiyimiz kimi alınmadı. Lakin qarşıdakı matçlara hazırlaşırıq. Hər qarşılaşmada yaxşı oyun göstərib, xal hesabımızı artırmağa çalışacağıq. Mövsümün ilk 12 turundakı öz çıxışıma gəlincə, tam razı deyiləm. Amma üzərimdə daha çox çalışmaqla daha da yaxşı oynamağa çalışıram. Komandamız hər görüşə qələbə üçün çıxır. “Sumqayıt”la səfər oyununa da 3 xal üçün yollanacağıq. Düşünürəm ki, rəqib meydanında yaxşı nəticə qazanarıq”.