“Qəbələ” 2015-ci ilin ilk rəsmi matçına fevralın 1-də çıxacaq.
İdmanxeber.com-un klubun saytına istinadən yaydığı xəbərə görə, “qırmızı-qaralar” 2014/15 mövsümünün ikinci yarısına XIX turda səfərdə “Bakı” ilə oyunla başlayacaq.Ukraynalı baş məşqçi Roman Qriqorçuk və qış fasiləsində transfer edilən futbolçular üçün debütlə əlamətdar olacaq görüş “Qəbələ”nin paytaxtın eyniadlı təmsilçisi ilə 33-cü dueli olacaq.
“Bakı”nın təlim-məşq bazasında baş tutacaq qarşılaşmayadək komandalar 32 dəfə üz-üzə gəlib. Bu oyunların 26-sı çempionat, 6-sı kubok çərçivəsində keçirilib. Baş tutan görüşlərdə 8 qələbə qazanan “Qəbələ” 9 dəfə heç-heçə ilə kifayətlənib. 15 matçda isə bakılılar qalib gəlib. “Qırmızı-qaralar” 27 qol vurduğu matçlarda 35 top buraxıb.
Bu oyunlarda “Qəbələ”nin 27 qoluna 18 futbolçu imza atıb. Komandanın ən yaxşı bombardiri Viktor Mendidir. Seneqallı legioner 6 dəfə rəqib qapısına yol tapıb.
Bütün qələbələrini Premyer Liqada qazanan “Qəbələ” çempionatdakı 26 oyunda 6 heç-heçə edib və 12 dəfə uduzub. Bu matçlarda 54 qol vurulub. “Bakı” 29, “Qəbələ” 25 top vurub.
17-ci dəfə paytaxt təmsilçisinin qonağı olacaq “qırmızı-qaralar” rəqib meydanında 3 qələbə qazanıb. Səfərdə 4 heç-heçəsi olan komanda 9 dəfə uduzub. Bakılılar öz meydanında top fərqində də öndədir – 22:12.
Ümumilikdə üstünlük “Bakı”nın tərəfində olsa da, son matçlar “Qəbələ”nin üstünlüyü ilə keçib. Ardıcıl 8 qarşılaşmada uduzmayan “qırmızı-qaralar” bu görüşləri qolsuz tərk etməyib. Komanda rəqib meydanındakı son 7 görüşdə də qolsuz qalmayıb.