Bir müddətdi redaksiyamıza aşağı yaş qruplarında keçirilən liqalara maddi dəstəyin kəsilib-kəsilməyəcəyi ilə bağlı suallar gəlir. Komandaların bir çoxu federasiyanın bu yarışlarda iştirak edənlər üçün ayırdığı yol xərcinin ləğv ediləcəyindən narahat olaraq, saytımıza müraciət edirlər.
Onsuzda çətin şəraitdə, məhdud imkanlarla bu liqalarda mübarizə aparan aşağı yaş qrupu komandaları üçün belə bir qərar böyük zərbə olardı. Hətta onların bir çoxu fəaliyyətlərini dayandıra bilərdi ki, bu da yüzlərlə uşağın futboldan getməsinə səbəb ola bilərdi.
Məsələni dəqiqləşdirmək üçün AFFA-nın mətbuat xidmətinin rəhbəri Elnur Məmmədliyə müraciət etdik. O, narahatlıq yaradan məsələylə bağlı İdmanxeber.az saytına bunları dedi:
“Belə bir məsələ gündəmdə yoxdur. Vəsaitin kəsiləcəyi ilə bağlı söz-söhbətlər doğru deyil”.
Həsən Quluzadə