Azərbaycan Premyer Liqasının XXV turunda Gəncədə “Neftçi”ni qəbul edəcək “Kəpəz” qarşıdakı oyunun hazırlıqlarına başlayır.
İdmanxeber.com-un məlumatına görə, komanda tarixi derbinin əsas hazırlığını Bakıda keçirəcək.
Son turda “Qarabağ” ilə oyundan sonra bərpaedici proseduradan (sauna, baseyn, massaj) keçib bir gün istirahət edən “sarı-göylər” bu gündən meydanda məşqlərə çıxacaq. Gəncə klubu aprelin 7-nə kimi Azərbaycan Dövlət Bədən Tərbiyəsi və İdman Akademiyasının stadionunda məşq edəcək. Bu günə olan hazırlıq prosesi saat 16:00-a təyin olunub.
Komandanın heyətində zədəli və cəzalı futbolçu yoxdu. Nicat Qurbanov və Şəhriyar Rəhimov cəza dövrünü başa vurduğundan “Neftçi”yə qarşı matçda oynaya biləcək.