Kateqoriyasız

Azarkeşlərindən “Neftçi” rəhbərliyinə ismarıc: “Özünüzü yığışdırın!”

Uğursuz çıxışı ilə azarkeşlərini məyus edən “Neftçi”də bu bərbad gedişata rəğmən dəyişikliklərin olmaması paytaxt klubunun fanatlarını hiddətləndirir.

İdmanxeber.az-ın məlumatına görə, sosial şəbəkələrdə “Neftçi” azarkeşlərinin üsyanını görməmək mümkün deyil. Paytaxt klubunun “facebook”dakı ən aktiv səhifələrindən olan “Neftchi Baku Fan Page” səhifəsi buna biganə qalmayaraq, paylaşım edib. Həmin paylaşımı olduğu kimi təqdim edirik:

“Komandamız hazırda dərin böhran yaşayır. Bu maliyyə böhranı deyil, idarəetmə sistemində olan böhtandır. Çox təəssüf ki, bəzi nazirlər kimi bizim yuxarılar da kresloya ömürlük oturduqlarını düşünür.
Komandanın böhranı göz önündədir. Əsas komanda oynamır, oynaya bilmir, oynamaq istəmir. Əvəzedici heyət 3 oyundan sonra 4 xalla 4-cü yerdə qərarlaşıb. Bu komandadan milliyə cəmi 1 oyunçu çağırılır. Hanı o gənclər? Axı 2 il əvvələ kimi heyətdə yaxşı gələcək vəd edənlər vardı. Hanı bəh-bəh ilə öyündüyümüz akademiyadan çıxan uşaqlar? Hanı? Bundan şəraitsiz komandadan Emil Balayev, Elvin Yuniszadə, Tərlan Quliyev, Slavik Alxasov, Cavid İmamverdiyev, Mirhüseyn Seyidov, Amid Quluzadə, Elşən Abdullayev, Mirabdulla Abbasov, Ağabala Ramazanov, Fəhmin Muradbəyli kimi oyunçular çıxıb. Demək olarki 3-5 il içində. Daha sonra bir tək Ömər Buludov ilə qalmışıq. İndidə İsmayıl Zülfüqarlı az-çox fərqlənir. Bu boyda işlər 2 ildə 1 oyunçu yetişdirmək üçün qurulub? Elvin Sərkərov, Rəhman Daşdəmirov, Əli Şirinov kimi gənclər necə oldu? Hamısı pul söhbəti ortaya atılaraq bir yolla uzaqlaşdırıldı komandadan. Bəs onda bu qədər pulu niyə xərcləyirsiz akademiyaya? İldə 1-2 normal oyunçu çıxmayacaqsa nəyə lazımdır? Niyə biz yetişdirən uşaqlar digər klublara qaçmalıdır? Axı nə üçün? Əvvəl hamısı ən bərbad zamanımızda belə bizə qaçırdı, indi hamı bizdən qaçır. Çünki akademiyada, əvəzedici komandada özbaşınalıq, “burda mənəm Bağdadda kor xəlifə” məsəli baş alıb gedir. Çoxdan bunlar barədə məlumatımız var, sadəcə komanda normal çıxış edəndə bunları yazıb özümüz barədə mənfi imic formalaşdıra bilmərik. Özünüzü yığışdırın bəylər”.


İdmanla bağlı qarşılaşdığınız hadisələrin video və ya fotosunu çəkərək bizə göndərin: 070 242 41 43