“Kəpəz”in kapitanı Yusif Nəbiyev “Turan Tovuz”la matçdan (0:2) sonra İdmanxeber.az-a musahibə verib.
O, ilk öncə oyun haqda fikirlərini bildirib:
– İstəməzdik, uduzaq. Qələbə üçün meydana çıxmışdıq. Nə istədiksə, alınmadı. Sonda uduzduq. Bundan dərs çıxarmaq lazımdır. Sonuncu yerdən qurtulmaq istəyiriksə, qələbə lazımdır.
– Bu mövsüm “Turan Tovuz”la oyunlarınız alınmır.
– Bu tilsimi qırmaq istəyirik. Aşağı-yuxarı eyni heyətlə çıxırıq. Hələ ki, alınmır. Bir oyun qalıb, ona hazırlaşacağıq.
– “Qarabağ”dan xal alıb, burada “Turan Tovuz”a uduzmağın səbəbini nədə görürsüz?
– “Qarabağ”la oyun öz azarkeşlərimiz qarşısında idi. O oyunla bugünkü arasında çox fərq var idi. O matçın heç 20 faizini oynaya bilmədik.
– Səbəb azarkeşlər idi?
– Səbəb biz idik. Çıxış yolu tapmalıyıq.
– Komandada eyforiya var idi?
– Belə şeyin olacağına inanmıram. “Turan Tovuz” evində yaxşı oynayır. “Qarabağ”dan xal almışıqsa, o demək deyil “Turan Tovuz”u rahat məğlub edəcəyik.
– Sonuncu sıranı tutan elitanı tərk edəcək. Bu, gərginlik yaratmır?
– Gərginlik var. Son sıralardan canımızı qurtarmaq istəyirik, amma hələ bacarmırıq.
– Kapitan olaraq qapıçı Orxan Sadıqlının yersiz qırmızı vərəqə almasını necə dəyərləndirərdin?
– Komanda geridə idi. Psixoloji baxımdan lazımsız, aqressiv hərəkət idi. Futbolda belə şeylər olur. Bu gün onun üstünə düşməyin mənası yoxdur. İçi mən qarışıq, günahkar hamıdır, meydana çıxan bütün futbolçular.
– Tərlan Əhmədov sizin üçün necə baş məşqçidir? Futbolçularla münasibətində aqressiv deyil?
– Bu haqda bir şey deyə bilmərəm. Bizim işimiz meydançadadır. Qalan şeylər bizə maraqlı deyil. Əhmədovla aramızda gərginlik yoxdur.
Həsən Quluzadə