UEFA Avropa Liqasının pley-off mərhələsində mübarizə aparan "Qəbələ" və "Qarabağ"ın oyunları ölkəmizdə canlı yayımlanacaq.
İdmanxeber.com-un əldə etdiyi məlumata görə, "Qəbələ"nin Yunanıstan "Panatinaikos"u, "Qarabağ"ın isə İsveçrə "Yanq Boyz"u ilə həm ev, həm də səfər matçı "İdman Azərbaycan" və ya AZTV-nin canlı yayımında olacaq.
Klublarımızın iştirakı ilə baş tutacaq həm ev, həm də səfər matçlarının yayımlanmasında problemin yaranmamasına səbəb öncədən ÇL və AL-in bu mərhələdən yayım hüququnun "İdman Azərbaycan" kanalında olmasıdı.
Qeyd edək ki, pley-off mərhələsinin ilk görüşləri avqustun 20-də keçiriləcək. İlk oyunlarda "Qəbələ" doğma azarkeşləri önündə oynayacaqsa, "Qarabağ" İsveçrədən sərfəli nəticə ilə qayıtmağa çalışacaq.