Futbol üzrə Azərbaycan millisi komandası Robert Prosineçkinin rəhbərliyi altında ilk beynəlxalq yoldaşlıq oyununu iyunda keçirəcək.
İdmanxeber.com-un “Report”a istinadən yaydığı xəbərə görə, bu barədə AFFA-nın baş katibi Elxan Məmmədov məlumat verib.
E.Məmmədov yoldaşlıq görüşünü Norveçlə “Avro-2016″nın seçmə qrup matçından öncəyə planlaşdırdıqlarını söyləyib. Baş katib hazırda bu məqsədlə 3 ölkə ilə danışıqlar apardıqlarını deyib: “Yoldaşlıq görüşünü 7-8 iyuna planlaşdırırıq. Mümkün rəqiblərdən biri Şotlandiyadır. Sadəcə, Şotlandiyanın teleyayım şərtləri çox ağırdır. Bir az çətin olacaq. Səfər oyunu olacağından, bizim telekanallar həmin oyunun yayım hüququnu almalıdırlar”.
Federasiya rəsmisi yoldaşlıq görüşünü səfərdə keçirmək istədiklərini vurğulayıb: “Çünki həmin vaxt I Avropa Oyunları ərəfəsindədir və stadionlarımız da bu Oyunlarda istifadə olunacaq. Üstəlik, rəsmi oyun səfərdədirsə, yoldaşlıq oyununu da orada keçirmək daha məqsədəuyğundur”.
Qeyd edək ki, Norveç və Azərbaycan yığmaları arasında “Avro-2016″nın seçmə qrup matçı iyunun 12-də keçiriləcək.