Bu gün keçirilən AFFA İcraiyyə Komitəsinin iclasında qəbul edilən qərarlar açıqlanıb.
İdmanxeber.com-un məlumatına görə, aparılmış müzakirələrdən sonra 11 qərar qəbul olunub.
Qərarlara əsasən, danışılmış oyunlar və oyun nəticələrinin manipulyasiyası ehtimalı ilə bağlı UEFA-dan daxil olmuş xəbərdarlıqlar barədə qərar qəbul olunması İntizam Komitəsinə tövsiyə edilib.
Vüqar Məmməd U-15 və U-16, Mirbağır İsayev U-17, Təbriz Həsənov U-19 üzrə Azərbaycan yığmalarının baş məşqçisi təyin olunub. Futzal üzrə Azərbaycan millisinin baş məşqçisi vəzifəsi Nilson Dos Santos Machadoya (Biro Jade) həvalə olunub.
IV İslam Həmrəyliyi Oyunlarında iştirak edəcək U-23 Azərbaycan yığmasının (1994-95-ci il təvəllüdlü) baş məşqçisi vəzifəsi Yaşar Vahabzadəyə həvalə edilib.
Bundan başqa, qərara əsasən, futbol veteranları Səməd Qurbanov, Asəf Namazov, Rafiq Mirzəyev, Abdulla Məmmədov, Məzahir Süleymanzadə, Rafiq Quliyev və Rafiq Yusubov AFFA-nın təqaüdü veriləcək.
Hakimlər Komitəsinin tərkibi aşağıdakı şəkildə təsdiqlənib:
– Futzal və Çimərlik futbolu üzrə komissiya: Elçin Səmədli
– Hakimlərin fiziki hazırlığı üzrə komissiya: Namiq Quliyev
– Metodiki-Tədris Komissiyası: Ceyhun Haşımov
– Təyinat Komissiyası: Kərim Ağayev
– Məsul katib: Nizami Şərifov
Hakim-İnspektorlar Komitəsinin üzvü Bəşir Əliyev komitə üzvlüyündən xaric olunub. Şahin Cəfərov Hakim-İnspektorlar Komitəsinin üzvü təyin edilib.
AFFA-nın yanında Media Komitəsinin fəaliyyət müddəti uzadılıb.
İclasda “İnter” PİK-in AFFA-nın müvəqqəti idarəçiliyinə götürülməsi ilə bağlı baş katibliyin hesabatı dinlənilib