“Qəbələ” Futbol Akademiyasının komandaları AFFA-nın yeniyetmə futbolçular arasında təşkil etdiyi liqalarda növbəti oyunlarını keçirib.
İdmanxeber.com-un klubun saytına istinadən yaydığı xəbərə görə, komandalar müxtəlif yaş qruplarında 14 qarşılaşmada qüvvəsini sınayıb. Bu matçların yalnız birində uduzub, birində heç-heçəylə kifayətlənən təmsilçilər 12 qələbə qazanıb.
U-19 komandası evdə “Rəvan”ı 3:2 hesabı ilə məğlub edib. Bu qələbələrdən sonra xal hesabını 16-ya çatdırıb, çempionatın liderləri “Bakı”, “Xəzər Lənkəran” və “Zirə”yə şərik olan “qırmızı-qaralar” əlavə göstəricilərdə 3-cüdür. Komanda növbəti turda “Kəpəz”in qonağı olacaq.
Keçirdiyi 7-ci oyunda da böyükhesablı qələbə qazanan U-17 səfərdə “Rəvan”ı 8 cavabsız qolla məğlub edib. 7 oyundan sonra 21 xalla yarışın lideri olan “qırmızı-qaralar” VIII turda “Qarabağ”ı qəbul edəcək.
U-16 səfərdə “Zirə”ni 6:0, evdə “Fortuna Səbail”i 4:0 hesabı ilə məğlub edib. 7 matçda 21 xal toplayan “Qəbələ” çempionatın lideridir. Komandamız növbəti turda “İnter”in qonağı olacaq.
Ardıcıl 11-ci qələbəsini qazanan U-15 təxirə salınan oyunda “Xəzər Lənkəran”ı 4:1, XII turda “Gəncə TİM”i 1:0 hesabı ilə məğlub edib. Bir oyunu təxirə salınan “Qəbələ” 11 matçda topladığı 33 xalla 1-ci pillədə qərarlaşıb. Komanda növbəti turda “İnter”in qonağı olacaq.
Paytaxt regionunun Bakı zonasında çıxış edən U-14 “Neftçi” ilə görüşdən 1:0, “İnter”lə qarşılaşmada 3:0 hesabı ilə qalib gəlib. “Qırmızı-qaralar” 7 oyundan sonra 19 xalla 1-ci pillədə qərarlaşıb. Komanda növbəti turda “Qarabağ”la görüşəcək. Eyni zonada çıxış edən U-13 “Əlincə”yə 0:1 hesabı ilə uduzub, “Sumqayıt”la qolsuz heç-heçə edib. 7 oyunda 12 xal yığan komanda 4-cü pillədə qərarlaşıb. VIII turda “Qəbələ” “Təhsil”lə üz-üzə gələcək.
U-12, U-11 və U-10 komandaları çıxış etdiyi Şimal-Qərb və Qarabağ regionunun Qəbələ zonasında VI turun oyunları keçirilib. Oğuz UGİM-i ilə qarşılaşan U-12 8:0 hesabı ilə qalib gəlib. “Qırmızı-qaralar” 5 oyunda 13 xal toplayaraq 2-ci yerdə qərarlaşıb. Komanda növbəti turda İsmayıllı UGİM-ini sınağa çəkəcək. U-11 Liqasında 5-ci qələbəsini qazanan “Qəbələ” bu dəfə “Daşqın”ı məğlub edib – 7:2. 15 xalla çempionatının lideri olan komanda növbəti turda Qax UGİM-i ilə görüşəcək. Klubumuzun U-10 komandası Yevlax UGİM-ini 10:1 hesabı ilə keçib. 6 matçda 18 xal qazanan “qırmızı-qaralar” yarışın lideridir. Komandanın növbəti rəqibi Yevlax “Rabitəçi UGİM”i olacaq. U-19 Qızlar Liqasında debüt mövsümünü keçirən “Qəbələ” 5-ci oyununu “Sumqayıt”a qarşı keçirib. 9:1 hesabı ilə qalib gələn “qırmızı-qaralar” 6 xalla 4-cü pillədə qərarlaşıb.