“Qarabağ”dan böyükhesablı qələbə gözləyirdik. Oyun buna doğru da gedirdi. İlk dəqiqələrdə ofsayd olduğu üçün sayılmayan qol qeydə alınsaydı, tamam başqa hesab ola bilərdi. Çünki erkən qol matçın istiqamətini dəyişir”.
Bu sözləri idmanxeber.az saytına azərbaycanlı məşqçi Adil Şükürov UEFA Avropa Liqasının III təsnifat mərhələsinin ilk oyunu çərçivəsində keçirlən “Qarabağ” – HİK görüşü (2:1) barədə danışarkən deyib. Mütəxəssis təmsilçimizin növbəti mərhələyə keçəcəyinə inandığını bildirib:
“HİK-in mübarizəsinə baxsaq, komanda olaraq müdafiə olundu. Yalnız əks hücumlara bel bağlayırdı. Bu şəkildə nəticə qazanmaq istəyirdilər. Oyunun gedişatına baxanda “Qarabağ” sona qədər tempi saxlaya bilmədi. Rəqib də təhlükəli hücumlar qururdu. Şahruddin yüksək səviyyədə çıxış edərək, “Qarabağ”ı biabırçılıqdan qurtardı”.
Şükürov Ağdam klubunun son dönəmlərdə oyun üslübunu dəyişdiyinə diqqət çəkib. O, komandanın axır matçlarda fərqli mübarizə ortaya qoyduğunu bildirib:
“Ümumiyyətlə, “Qarabağ”da son vaxtlar fərqli oyun üslubu görürük. Qurban Qurbanov artıq oyun istiqamətini daha tez dəyişmək istəyərək, rəqib müdafiəçiləri çaşdırmağı planlayır. Uzun cinah ötürmələrinə tez-tez rast gəlirik. Bu da başadüşüləndir. Çünki Avropa klubları yerli çempionatlarda ayrı, avrokubok görüşlərində fərqli taktika ilə mübarizə aparır. Bunun üçün də bəzi gözlənilməz gedişlər olur. Çünki artıq bütün komandalar dəyişir, hər kəs oyunlara fərqi yanaşır. Fikir versəniz, “köhlən atlar” da daxili çempionatda ayrı, avrokuboklarda başqa heyətlə mübarizə aparır. Elə komandanın oyunlarda sona qədər tempi saxlaya bilməməsində əsas səbəb budur.
Ancaq yenə ümidliyik. Mərhələni keçəcəyimizə inanırıq. Biz milli səviyyəsində Finlandiya, Polşa kimi ölkələrdən çox geridəyik. Amma klub səviyyəsində oynayan legionerlər kifayət qədər yaxşı futbolçulardı. Bunu “Qarabağ”ın son illərdəki nəticələrdən də görmək olar”.
Həsən Quluzadə