Azərbaycan 1-ci liqansının 2-ci turu rekord nəticə ilə əlamətdar olub. “Şamaxı” öz meydanında “Araz Saatlı”nı 8:0 hesabı ilə məğlub edib.
İdmanxeber.az PFL-in saytına istinadən xəbər verir ki, bu, klubun tarixində bütün turnirlər nəzərə alınmaqla ən böyükhesablı qələbə rekordunun təkrarıdır. Əsası 1997-ci ildə qoyulan, tarixi ərzində “Xəzər Universiteti”, “İnter” və “Keşlə” adlarını da daşıyan indiki “Şamaxı” bunadək bir dəfə 8 top fərqi ilə qalib gəlib.
Şamaxı şəhər stadionundakı nəticə həm də 1-ci liqada son 7 mövsümün ən böyük hesabıdır. 2016/17 mövsümündən sonra belə fərq ilk dəfə qeydə alınıb.
2016-cı il noyabrın 24-də “Səbail”lə “Bakılı” arasındakı matçda indiki kimi 8 top fərqi qeydə alınıb – 11:3. Sonuncu dəfə daha böyükhesablı qələbə isə həmin qarşılaşmadan 16 gün əvvələ təsadüf edib. “Zaqatala” öz meydanında “Energetik”i 10:0 hesabı ilə üstələyib.