Azərbaycanlı FIFA reserisi Əliyar Ağayev ölkə futbolu tarixində ilk dəfə Çempionlar Liqasının qrup mərhələsi oyununu idarə etməsi barədə danışıb.
İdmanxeber.az xəbər verir ki, təcrübəli hakim “Radio Enerji”də “Səhərin şərhi” verilişinə açıqlamasında briqada şəklində bu işin öhdəsindən lazımınca gəldiklərini söyləyib:
“Çempionlar Liqası bəlkə də klublar arasında dünyanın ən mötəbər yarışıdır. Necə ki hər bir futbolçunun arzusu burada oynamaq, bu himnin sədaları altında meydana daxil olmaqdır, eləcə də, hər bir beynəlxalq dərəcəli hakimin də arzusu Çempionlar Liqasında oyun idarə etməkdir. Şükürlər olsun, bu, bizə qismət oldu. Həyəcan var idi. Bunu ikiqat edən də bütün futbol ictimaiyyətinin bizi canlı izləməsi idi. Məsuliyyətimiz daha da artırdı. Briqada şəklində oyunun öhdəsindən lazımınca gəldik. Ölkəmizin adını layiqincə təmsil etməyi bacardıq. Göstərdik ki, bizdə hakimlik kökləri, ənənələri var. Bu oyuna çıxmağımıza qədər keçdiyimiz uzun yolda bizə zərrə qədər də köməyi olmuş hər kəsə minnətdarlığımı bildirirəm”.
Əliyar Ağayev Çempionlar Liqasının qrup mərhələsinin “Kopenhagen” – “Borussiya” (Dortmund) oyununu idarə edib. O, 1:1 hesablı heç-heçənin qeydə alındığı görüşdə hər iki komandanı 2 sarı vərəqə ilə cəzalandırıb. Əliyar Ağayevə bu qarşılaşmada Zeynal Zeynalov və Akif Əmrəli laynsmanlar qismində yardımçı olub. Dördüncü hakim funksiyasını Kamal Umudlu yerinə yetirəcək.