“Bu gün Azərbaycan kubokunun püşkatmasıdır. Bu münasibətlə klublarımızı təbrik edirəm”.
İdmanxeber.az-ın məlumatına görə, bunu Peşəkar Futbol Liqasının (PFL) prezidenti Ramin Musayev deyib. O, Azərbaycan kubokunda 2021/22 mövsümünün püşkatma mərasiminə qatılıb. Musayev mərasimin açılışında bunları söyləyib:
“Düşünürəm ki, bu il ötən mövsümdəkindən daha maraqlı oyunlar olacaq. Çempionatın gedişindən belə qənaətə gəlirəm. Elə oyunlar izləyirik ki, o matçların nəticələri gözlənilməz olur. Bunun davamı inşallah, kubokda da gələcək. Ötən mövsüm “Keşlə”nin kuboku qazanması heç kimin ağlına gəlməzdi”.
Musayev final oyununun məkanının hələ müəyyənləşmədiyini də əlavə edib: “Mətbuatda yazırlar ki, bu oyun Şamaxıda olacaq. Hədəfimiz məkanından asılı olmayaraq, qarşılaşmanın maraqlı alınmasıdır”.
Ramin Musayev Region Liqasında mübarizə aparan komandaların Azərbaycan kubokunda iştirak etməməsinə də toxunub:
“Region Liqasındakı komandaların Azərbaycan Kubokunda iştirakı bir az qeyri-peşəkar olar. Oradakıların hamısına peşəkar demək olmaz. Komandaların sayı çox olsa daha yaxşı olar, amma peşəkarlıq baxımından yaxşı olmaz. Torpaqlarımız işğaldan azad olunub. Həmin bölgələrin komandalarını inşAllah görəcəyik”.