“Komandamdan razı qaldım. Birinci hissədə yaxşı oynadıq. Çoxlu qol vəziyyəti yaratdıq”.
İdmanxeber.com-un apa-ya istinadən məlumatına görə, bunu “İnter”in baş məşqçisi Zaur Svanadze deyib.
Azərbaycan Premyer Liqasının IV turunda “Sumqayıt”ın qonağı olan “bankirlər” meydandan 2:1 hesablı qalibiyyətlə ayrılıb.
Matçdan sonrakı mətbuat konfransında gürcüstanlı mütəxəssis qələbəni belə şərh edib: “Bu cür işləməyə davam edəcəyik. İkinci qolu vurduqdan sonra rəqib hücumlar qurmağa başladı, təzyiqi artırdı. Əsasən cinahlardan ötürmələr sayəsində epizodlar yaratdılar. Təəssüf ki, son dəqiqələrdə qol buraxdıq”.
– Hazırda “İnter”də çatışmayan nədi?
– Konkret çatışmazlığı bilmirəm. Bəzən futbolçumuz olmalı olduğu yerdə olmur. Düşünürəm ki, tezliklə bu problemi də aradan qaldıracağıq.
– “İnter”ə qoyulan transfer qadağası haqda fikriniz necədi?
– İstəyirdik ki, bir-iki mövqeyə futbolçu alaq. Amma transfer qadağasına görə bu alınmayacaq. Lakin problem yoxdu. İşləmək lazımdı. Futbolçular başa düşməlidilər ki, qadağadan sonra kollektiv şəkildə daha yaxşı mübarizə aparmalıdılar.