“Əvvəlki turda “Qəbələ” bizdən yaxşı oynadı, sadəcə bəxtimiz gətirdi, 2 qol vurduq və qələbə qazandıq. Bugünkü matçda isə “Kəpəz” daha çox istəkli idi. Onları da qələbə münasibəti ilə təbrik edirəm. Biz isə öz üzərimizdə çox çalışmalıyı. Səhvlərimiz çox oldu”.
İdmanxeber.com-un məlumatına görə, bu sözləri Azərbaycan Premyer Liqasının 18-ci turu çərçivəsində keçirilən “Kəpəz” – “Səbail” matçı sonrası baş tutan mətbuat konfransında qonaqların baş məşqçisi Samir Əliyev deyib. Gənc mütəxəssis oyunla bağlı verilən sualları da cavablandrıb.
– Səhvlər deyərkən nəyi nəzərdə tutursunuz?
– Söhbət taktiki səhvlərdən gedir.
– Buraxdığınız qolları necə dəyərləndirirsiniz?
– “Kəpəz” elə çox qol epizodu yaratmadı, ancaq hücumları dəqiq tamamladı. Onlara təbrik düşür. Biz isə “Səbail” olaraq məqsədimizlə yolumuza davam edirik.
– Hansı məqsədlərdən söhbət gedir?
– Bu oyunu tezliklə unutmaq istəyirik. Layiqli mübarizə aparmaq və əzmkar komanda formalaşdırmaq niyyətindəyik.
– Əvvəlki görüşlərdə sizi daha emosiyanal və çılğın görürdük. Bu matçda isə yox…
– Düzdü, əvvəlki matçlarda daha çılğın idim. Çalışıram ki, bu xasiyyətimi yığışdırım. Futbolçular da özlərini meydanda rahat hiss etsinlər. Hər oyun futbolçuların üstünə qışqırası deyiləm ki?