İdman

“İşimiz çətin olacaq” – millimizin oyunçusu

“İşimiz çətin olacaq, ancaq yaxşı şansımızın olduğunu da deyə bilərəm”.

İdmanxeber.az-ın məlumatına görə, bunu Azərbaycan millisinin futzalçısı Tyaqo Bolinya final mərhələsi 2024-cü ildə keçiriləcək dünya çempionatının elit-raundunun püşkü barədə danışarkən deyib.

36 yaşlı oyunçu nisbətən Qazaxıstan yığmasını favorit hesab etdiyini bildirib: “Onların son illərdə daha yaxşı çıxış etdiklərini nəzərə almaq lazımdır. Rumıniya seçməsi ilə qarşılaşmasaq da, klub səviyyəsində “Araz-Naxçıvan”ın heyətində onların çempionu olmuş “Deva” ilə üz-üzə gəlmişdik. Məğlub olduğumuz qarşılaşma çox çətin keçmişdi. Niderland isə 1 il əvvəl Avropa çempionatına ev sahibliyi etməklə yanaşı, iştirak etmək hüququ da qazanmışdı. Güclü rəqibdir. Ancaq indiyəqədərki nəticələrə, iştirak etdikləri turnirlərə diqqət yetirsək, Qazaxıstan qədər deyillər”.

Bolinya qatıldıqları turnirlərdə favorit hesab olunduqlarını sözlərinə əlavə edib: “Biz də yaxşı oynayırıq. Təbii ki, sözlə heç nə həll olunmur. İddian böyükdürsə və ona çatmaq istəyirsənsə, yaxşı hazırlaşmalısan, bir neçə toplanış keçirməlisən, yoldaşlıq oyunlarında gücünü sınamalısan və rəsmi oyunlara qədər hansı çatışmazlıqların varsa, onları qaydasına salmalısan. Komandamızın əksər üzvü başqa klublarda, çempionatlarda çıxış edir, fərqli üslubda oynayırlar. Bir yerdə daha çox məşq etməliyik ki, baş məşqçinin verdiyi tapşırıqları yerinə yetirək, istədiyini özünə qaytaraq. Yenə deyirəm, nəticəmiz yaxşı ola bilər. Çünki komanda yoldaşlarıma güvənirəm. Vacib olan evdə keçirəcəyimiz hər 3 oyunda qələbə qazanmaq, səfər matçlarında isə mümkün qədər çox xal toplamaqdır”.


İdmanla bağlı qarşılaşdığınız hadisələrin video və ya fotosunu çəkərək bizə göndərin: 070 242 41 43