Kateqoriyasız

Premyer Liqa klublarının gəlirləri bilindi: 1 ilə 10 milyon manat artım

Azərbaycanın Premyer Liqa klublarının gəlirləri kəskin artıb.

İdmanxeber.az xəbər verir ki, 2021-ci ildə ölkənin ən güclü 8 futbol klubunun gəlirləri 54,8 milyon manat təşkil edib. Bu 2020-ci illə müqayisədə 10 milyon manat və ya təqribən 25 faiz artıqdır.

2021-ci ildə ən çox gəliri Ağdamın “Qarabağ” klubu əldə edib – 16,3 milyon manat. Gəlirlərin həcminə görə ikinci yeri “Neftçi” tutur – 13,7 milyon manat.

Ölkədə 2 klubun illik gəliri 2 milyon manat ətrafındadır, bunlar “Qəbələ” (2,6 milyon manat) və “Səbail”dir (1,9 milyon manat).

“Şamaxı”, “Zirə” və “Sumqayıt” klublarının gəlirləri 4-4,5 milyon manat arasındadır. “Sabah” isə illik 7 milyondan artıq gəlir əldə edib.

Ümumilikdə bütün gəlirlərin 62 faizi “Qarabağ” və “Neftçi” klublarının payına düşüb.

2020-ci illə müqayisədə 6 klubun gəlirləri artıb, 2-nin gəlirləri azalıb. Ən sürətli artım “Sumqayıt” klubunda olub – 4,2 dəfə. “Neftçi”nin gəlirləri 47 faiz, “Qarabağ”da 30 faiz artıb. Məbləğ ifadəsində ən çox gəliri artan klub “Neftçi” olub – 4,4 milyon manat. “Qarabağ”ın gəlirləri 3,7 milyon manat, “Sumqayıt”ın gəlirləri isə 3,4 milyon manat artıb.

“Səbail” və “Şamaxı” klubları isə gəlirləri azalanlar arasındadır, müvafiq olaraq 30 faiz və 11 faiz. Məbləğ ifadəsində “Səbail”in gəlirlərində 876 min manat, “Şamaxı”da isə 523 min manat azalma olub.  (Fed.az)


İdmanla bağlı qarşılaşdığınız hadisələrin video və ya fotosunu çəkərək bizə göndərin: 070 242 41 43