Türkiyənin PTT birinci liqasında mübarizə aparan "Kahramanmaraşspor"un azərbaycanlı futbolçusu Murad Axundzadə idmanxeber.com saytına müsahibə verib.
– "Kahramanmaraşspor"da işlərin necə gedir?
– Pis. Ayrılmaq üzrəyəm.
– Qərarın qətidir? Bu barədə baş məşqçi ilə və yaxud rəhbərliklə danışmısan?
– Yox, məcburi… Pullarımızı vermirlər, komanda da xaosdu. Heç kim pulunu ala bimləyib. Böyük ehtimalla ayrılacam.
– Ayrılsan hara gedəcəksən? Səninlə maraqlanan klublar var və yaxud konkret təklif göndərən…
– Yox vallah, hələ heçnə bilmirəm. Ancaq menecerlər işləyir, yəqin bir klub taparlar bizə.
– Azərbaycana geri dönmək ehtimalı var?
– Türkiyədə qalmaq istəyirəm, amma vətənimdə niyədəki yox…
– Neçə aydı maaş ala bilmirsən?
– Gedəndən bu yana… Heç kim pul almır, cibxərcliyi verirlər arada. Onunla başımızı fırladırıq.
– Bəs, niyə Türkiyədə qalmaq istəyirsən? Çünki digər klublarda da başına eynən həmin hadisə gələ bilər. Nə düşünürsən?
– Türkiyədə səviyyə başqadı. Bir də legioner olanda "otnaşeniya" başqadı. Bakıda adamı yada salan da yoxdu.
– Yəni sənin sözündən belə çıxır ki, Türkiyə birinci liqası bizim Premyer Liqadan daha səviyyəlidir.
– Yox, yox onu demədim. Madriddə oynamırameee, "Karamanmaraşspor"da oynayıram. Nə səviyyəsi? Sadəcə burada özünü futbolçu kimi hiss eləyirsən. Klubdan kluba fərq var. Mən "Rəvan"dan götürdüm.
– Yəni, "Kahramanmaraş" "Rəvan"dan daha peşəkardır?
– (Suala cavab vermir).
– Konkret qarşına hansı hədəfi qoymusan?
– Əsas hədəfim milli komandadı.
– Burdan Foqtsa nəsə demək istəyirsən?
– (gülür) Yox. Lippertə demək istəyirəm ki, çağırsın, yoxlasın bari…
Azər Axundlu