“Kəpəz” Topaz Premyer Liqasının 13-cü turunda evdə “Qəbələ”yə 1:6 hesabı ilə uduzub.
Idmanxeber.com-un məlumatına görə, oyundan sonra Gəncə klubunun qolkiperi Davud Kərimi jurnalistlərin suallarını cavablandırıb. Təcrübəli əlcək sahibi ilk olaraq oyun haqda danışıb:
– Danışılası söz yoxdur. Hər şey göz qabağındadır. Bilirdik ki, bizdən istəkli idilər. Çünki Gəncəyə bizdən tez gəlmişdilər. Həm də son 3 oyunda bizə qalib gəlməmişdilər. Çətin olacağını dərk etmişdik. Belə olacağını gözləmirdik. Çox məyusuq. Yunis Hüseynovun debütündı belə olmasını istəməzdik. Öz səhvlərimizdən uduzuduq.
– Komandada motivasiya yox kimi idi…
– Biz çox istəkli idik. Ola bilər ki, “yandıq”. 1-ci dəqiqədə vuraln qol bizi “sındırdı”. Daha sonra mənim etdiyim səhv uşaqları ruhdan saldı. İnanıram ki, bundan nəticə çıxarıb növbəti oyunları yaxşı keçirəcəyik.
– Bu nəticə ilk oyundakı qələbənin təsadüf olduğunu göstərdi?
– Xeyr, onlar həmin oyunda da istəkli idilər. Son pillədən qurtulmaq istəyirik. Hər məğlubiyyət bizi geri salır. Yunis müəllimin gəlişinə görə uduzmaq istəmirdik. Lakin alınmadı.
– “Kəpəz” ətrafında gəzən söz-söhbətlər komandaya necə təsir?
– Bunların futbolçulara aidiyyatı yoxdur. Bu, yuxarı səviyyədə olan söhbətlərdi. Şahin müəllimin gedişindən sonra yeni nəfəs lazım idi və Yunis Hüseyov komandaya gəldi.
– Yunis Hüseynov oyundan sonra sizə nə söylədi?
– Bildirdi ki, bu komanda ilə həmin “Qəbələ”yə qarşı yaxşı oyun nümayiş etdirəcəyik. Əlavə etdi ki, bütün komandalara qarşı başağrısı olacağıq.
– Adına yaraşmayan qollar buraxdın…
– 2-ci qolda topu tez tutaraq oyuna başlamaq istədim. Lakin topa sahib ola bilmədim və Monrozun qarşısına düşdü, o da qapını dəqiq nişan aldı. Kobud səhv etdim. 4-cü qolda kobud səhvimin olduğunu deməzdim. Qabaqda durmuşdum, müdafiəçimizin səhvindən sonra Dabo topu başımın üstündən atdı.
– Erkən qola görə ruh düşkünlüyü var idi, yoxsa matçdan öncə də belə idiniz?
– Xeyr, biz Yunis müəllimin ilk oyununda uduzmaq istəmirdik. Məsuliyyətli yanaşırdıq. Rəqiblərimizdən aralanmaq istəmirik. Alınmadı, ilk qol pis təsir etdi. Ardından mən səhv etdim.
– “Kəpəz” yeni qazonda istədiyi kimi oynamır. Ancaq kələ-kötür stadionda klublara başağrı idiniz. “Kəpəz” normal stadionda futbol oynaya bilmir?
– Mən də fikirləşirəm ki, bu stadionda ötən mövsüm ancaq “Qarabağ”a uduzmuşduq. Rəqiblər Gəncədən 3 xalla qayıtmırdı. Özümüz də məəttəlik ki, nə baş verir. İnanıram ki, yaxşı nəticələr qazanacağıq. 3 futbolçumuzun olmaması da öz sözünü ciddi olmasa da, dedi.
– Yunis Hüseynovla Şahin Diniyev fəlsəfələrində nə fərq var?
– Şahin müəllim müdafiədən oyun qururdusa, Yunis Hüseynov hücumameyilli oyun istəyir.