Futbol üzrə İtaliya A Seriyasında 2020/21 mövsümünün qalibi müəyyənləşib.
“İnter” sona dörd tur qalmış çempionatın qalibi olub.
Bu, 34-cü turda “Atalanta”nın səfərdə “Sassuolo” ilə səfər oyunundakı xal itkisindən sonra rəsmiləşib. Bu qarşılaşma 1:1 hesabıyla bitib. Nəticədə, “Atalanta” 69 xalda qalıb. Bu turda “Krotone” ilə ev oyunundan 2:0 hesablı qələbə ilə ayrılan “İnter” isə xalını 82-yə çatdırıb. Beləcə, Antonio Kontenin çalışdırdığı komanda sona 4 tur qalmış ən yaxın izləyiciləri “Atalanta” və “Milan”ı 13 xal geridə qoyub.
Qeyd edək ki, bu, “İnter”in tarixində 19-cu İtaliya çempionluğudur. Sonuncu dəfə bu komanda 2009/10 mövsümündə Joze Mourinyonun rəhbərliyi altında A Seriyasının qalibi olmuşdu.
İtaliyada çempionluq sayına görə “Yuventus” bütün rəqiblərindən öndədir. Turin təmsilçisinin hesabında 36 çempionluq var. “İnter” isə 19 çempionluqla ikincidir.