“Startdan razıyıq. Qolsuz bərabərlik bizim üçün yaxşı nəticədi”.
İdmanxeber.com-un məlumatına görə, bu sözləri Şimali İrlandiya yığmasının baş məşqçisi Maykl Onil deyib.
DÇ-2018-in seçmə mərhələsində yığmamızın rəqiblərindən olan Britaniya təmsilçisi dünən Çexiyanın qonağı olub. Qolsuz heç-heçə edən Şimali İrlandiya təsnifat mərhələsinə 1 xalla başlayıb.
Matçdan sonra fikirlərini bölüşən Onil əvvəlcə Çexiya görüşü dəyərləndirib. O, söhbət əsnasında oktyabrda San-Marino, noyabrda isə Azərbaycanla keçirəcəkləri oyunların vacibliyini də vurğulayıb: “Çətin səfər oyununda xal almaqla, uğurlu başlanğıc etdik. Çexiyaya topa nəzarət etmək üçün gəlməmişdik. Sadəcə, yaxşı təşkilatlanmalı və öz keyfiyyətlərimizi göstərməliydik. Bunu da bacardıq. İlin sonuna qədər San-Marino və Azərbaycanla ev oyunlarımız olacaq. Bundan əlavə, səfərdə Almaniya ilə qarşılaşacağıq. Ümid edirik ki, bu görüşlərdən 7 xalla ayrıla biləcəyik. Səfərdə almanlardan da xal almağa çalışacağıq. Xüsusilə, San-Marino və Azərbaycanla ev oyunlarımızı səbirsizliklə gözləyirik. Bizə həmin matçlarda mütləq qələbə lazımdı”.
Onil Azərbaycan millisinin çətin rəqib olduğunu, noyabrda yığmamızla baş tutacaq qarşılaşmanın asan keçməyəcəyini bildirib: “Çox çətin qrupda yer almışıq. Azərbaycanla yaxın keçmişdə qarşılaşmışıq. Onlarla öz meydanımızdakı oyun da asan olmayacaq. Səfərdə isə istənilən matç isə çətin keçir”.(apasport)