“Qarabağ”ın baş məşqçisi Qurban Qurbanov sabah ÇL-in ikinci təsnifat mərhələsi çərçivəsində sabah qarşılaşacaqları “Dandolk”la oyundan öncə jurnalistlərin suallarını cavablandırıb.
İdmanxeber.az-ın məlumatına görə, təcrübəli mütəxəssis sabahkı oyunun çətin keçəcəyini bildirib:
Çətin oyun olacaq. Hər iki komanda çox istəklidi. Biz də həddindən artıq çox istəyirik ki, mərhələni adlayaq. Sabah maraqlı oyun olacaq.
– Zədəlilərin son durumu nə yerdədi?
Bədavi Hüseynov hələ də sağalmayıb. Onda durum yaxşı deyil. Bir məşqdə yenə ağrı hiss etdi və fərdi məşqləri 4-5 günlük dayandırdı. Qalan digər zədəlilər yüz faiz hazır olmasa da, komandaya kömək edə biləcək səviyyədədilər.
– Yeni transferləri sabah meydanda görəcəyik?
Sabahkı oyunda əsas heyətdə olmayacaqlar. Ancaq onlardan birinin adını “18”liyə salacağıq.
– Rəqibin oyununa görə , nə isə fərqli dəyişikliklər görəcəyikmi?
Biz çalışırıq ki, öz oyun üslubumuzu qoruyaq. Sabahkı oyunda istədiklərimizi meydanda qoymağa çalışacağıq. Rəqibi analiz eləmişik, onların istədiklərini həyata keçirməməyə çalışmalıyıq.
– Rəqib düşərgəsindən bildiriblər ki,”Qarabağ” sabah əsəbi oynayacaq. Siz bu barədə nə deyərdiz?
Əsəbi olmayacağıq. Ancaq meydanda idman prinsipləri baxımından əsəbi oynaya bilərik.
– Avroliqada “Neftçi”nin “Arsenal”ı keçəcəyini düşünürsüzmü?
İnşallah keçəcək və ölkə reytinqimizə xallar əlavə edər.