Türkiyənin “Trabzonspor” klubunun yarımmüdafiəçisi Murat Cem Akpınar millimizin şərəfini qoruya bilər.
İdmanxeber.az-ın məlumatına görə, Trabzon təmsilçisinin üzvü Azərbaycan və Türkiyə milliləri arasında seçim edəcəyini deyib.
61saat.com-a danışan 20 yaşlı yarımmüdafiəçi seçim etmədiyini bildirib: “Azərbaycanın aşağı yaş qruplarından ibarət millisində oynamışam. Təklif olsa, Türkiyə millisində çıxış edə bilərəm. Ancaq bu iki yığma arasında seçim etməmişəm”.
Akpınar 2015-ci ildə Azərbaycanın U-17 millisində 13 oyuna 2 qol vurub. Gənc futbolçu bu mövsüm “Trabzonspor”un heyətində Super Liqada 5 oyuna 1 qol vurub. O, Türkiyə kubokunda 3 oyun keçirib.