UEFA Konfrans Liqasının II təsnifat mərhələsinin ilk oyununda “Zirə”ni 3:0 hesabı ilə məğlub edən İsrailin “Makkabi” (Təl-Əviv) klubunun düşərgəsində insident baş verib.
İdmanxeber.az xəbər verir ki, matçdan sonra futbolçu Oskar Qluxun atası Maksim Qlux baş məşqçi Vladimir İviçə hücum edib. Bu barədə İsrail mətbuatı məlumat yayıb.
Maksim 18 yaşlı israilli yarımmüdafiəçinin 89-cu dəqiqədə meydana çıxmasına qəzəblənib. O, açıqlamasında “Makkabi”nin çalışdırıcısını axmaq da adlandırıb:
“Oğlum bu baş məşqçi ilə eyni komandada qalmayacaq. Start heyətində meydana çıxmalı idi. Hazırda onun klubdan ayrılması gündəmdədir. Qlux cavab matçının iştirak ərizəsində yer almayacaq. Rəhbərlik bu günlərdə iclas keçirəcək və Oskar Qluxun başqa kluba keçidini müzakirə edəcək”.
Komandalar arasındakı cavab oyunu iyulun 28-də İsraildə olacaq.