AFFA aşağı yaş üzrə milli komandalarının baş məşqçiləri ilə bağlı qərarını verib.
İdmanxeber.az-a verilən məlumata görə, söhbət U-15, U-16, U-17, U-18 və U-19 komandalarından gedir. Federasiya rəhbərliyi sözügedən millilərdəki durumdan narazıdır. Bu səbəbdən yığmada çalışan baş məşqçilərlə müqavilə yenilənməyəcək.
Xatırladaq ki, U-15-dən U-17-dək millilərdə məsul şəxs Aqil Nəbiyevdir. Bu komandaların hamısı təcrübəli mütəxəssisə tapşırılmışdı.
U-19 yığmamıza isə İlham Yadullayev rəhbərlik edirdi. AFFA sözügedən iki çalışdırıcı ilə yolları ayırmağa qərar verib.
Bu komandaların hər birinə yaxın vaxtlarda baş məşqçi təyinatı olacaq.
U-20 və U-21 millilərimizdə isə dəyişiklik gözlənilmir. 21 yaşlılardan ibarət yığmamızın çalışdırıcısı Rəşad Eyyubovun postundan göndəriləcəyi iddia edilsə də, AFFA gənc mütəxəssislə yola davam edəcək
U-20 millimizə yeni təyin olunan portuqaliyalı baş məşqçi Ruy Jorje də vəzifəsində qalaraq, komandanı dünya çempionatına hazırlayacaq. Rəhbərliyin hər iki mütəxəssisin işindən razı olduğu bildirilir.