“Kəpəz”in müdafiəçi Dioqo Verdaşda İdmanxeber.az saytına müsahibə verib. Portuqlaiyalı futbolçu “Sumqayıt” qələbəsindən danışıb və mövsümü dəyərləndirib.
– Hər iki komanda da Premyer Liqada qalmağı təmin etməsinə rəğmən, “Sumqayıt”la çox gərgin oyun keçdi. Bunun səbəbi nə idi?
Açığı, gərginliyin səbəbini bilmirəm. Biz sadəcə qələbə qazanıb 8-ci pilləyə yüksəlmək istəyirdik. Bunu bacardıq. Bu gündən sonra da bu pilləni qorumaq istəyəcəyik. Bu, “Kəpəz”in ən yaxşı oyunlarından biri idi.
– “Kəpəz” Premyer Liqada qalmağı bacardı. Klubun rəhbərliyində də dəyişiklik olub. Növbəti mövsüm daha böyük hədəflərin olacağı deyilir. Qalacaqsan klubda?
Açıq danışsaq, bura gələndə vəziyyət o qədər də yaxşı deyildi. Amma sonda məqsədimizə çatdıq. Hələ qarşıda iki oyun var, bu oyunlarda da qalib gəlmək istəyirik. Gələcəyimlə bağlı yekun qərarımı verməmişəm. Gərgin keçən mövsümün ardından dincəlmək istəyirəm.
– Mövsümü çox yaxşı keçirmisən. “Kəpəz”in yeni müqavilə təklifinə nə cavab verərsən?
Hazırda bütün fikrimi “Kəpəz”lə qarşıdakı iki oyuna yönəltmişəm. Karyeram üçün ən yaxşısı nədirsə, o da olsun. İndi komanda axtarmıram. Ailəm və karyeram üçün hara uyğundursa, orada da gedəcəm. Əgər klub mənimlə müqavilə uzatmaq istəyirsə, menecerimlə məsləhətləşəcəm. Qərarımı bundan sonra açıqlaya bilərəm.
– Demək olar ki, bir ildir Azərbaycanda oynayırsan. Premyer Liqanın səviyyəsini necə dəyərləndirirsən?
Çox yaxşıdı. Burada oynamaq o qədər də asan deyil. Premyer Liqa çıxış etdiyim çempionatlar içində ilk “üçlüy”ə girər. Burada çox yaxşı futbolçular var. Kimin neçənci pillədə olmasından asılı olmayaraq, bütün oyunlar çətin keçir.
Həsən Quluzadə