"Zirə"nin təcrübəli yarımmüdafiəçisi Rəşad Sadiqov Avropa Liqasının II təsnifat mərhələsinin ilk oyunu çərçivəsində səfərdə qarşılaşdıqları "Astra" görüşü haqda danışıb.
İdmanxeber.com-a açıqlamasında Sadiqov ilk oyunun olduqca ağır keçdiyini bildirdi: "Astra" çox yaxşı komandadı. Təsadüfü deyil ki, ötən mövsüm Avroliqada 1/16 final mərhələsinə qədər irəliləyə biliblər. Bizim uşaqlar da pis təsir bağışlamırdılar. Buna baxmayaraq standart vəziyyətdən 2 qol buraxdıq. Heç-heçə hesabını qoruyub saxlaya bilməməyimizə səbəb təcrübəsizlik oldu".
İlk görüşdə qeydə alınan məğlubiyyətə baxmayaraq komandada yüksək əhval ruhiyyənin hökm sürdüyünü bildirən Rəşad qələbə qazanacaqlarına ümid etdiklərini sözlərinmə əlavə etdi: " Uşaqlar həqiqətən qələbəyə inanırlar. Baxmayaraq ki, rəqib güclüdü ancaq niyə də qələbə qazanmayaq? Düşünürəm ki, 2 cavabsız qolla qalib gələ bilərik. O qədər görmüşük ki, ilk oyunda böyükhesablı qələbə qazanan komanda cavab matçında uduzub, mərhələni adlaya bilməyib. Bununla belə mərhələni adlaya bilməsək, bu faciə sayılmayacaq. Çünki rəqibin təcrübəsi bizdən artıqdı".