“Neftçi”nin UEFA Konfrans Liqası II təsnifat mərhələsindəki rəqibi “Jelezniçar” Bakıya itkilərlə gələcək.
İdmanxeber.az-ın məlumatına görə, rəqibin müdafiəçisi Amar Drina sözügedən görüşdə iştirak etməyəcək. Buna 21 yaşlı müdafiəçinin evdə “ağ-qaralar”la 2:2 hesablı heç-heçə etdikləri ilk qarşılaşmada sarı vərəqə görməsi səbəb olub.
Bu mövsüm avrokuboklarda 3-cü dəfə rəsmi xəbərdarlıq alan gənc oyunçu cəzalı duruma düşüb.
Sarayevo təmsilçisinin heyətində başqa itkilər də var. Edin Kokaliç, Edin Rustemoviç və Semir Ştiliç ilk matçda iştirak etməyiblər. İrfan Yaşareviç və Cozef Amoa isə “Neftçi” ilə qarşılaşmada zədələnərək meydanı tərk ediblər.
Qeyd edək ki, avqustun 3-də 8-ci km stadionunda oynanılacaq qarşılaşma saat 21:00-da başlayacaq.