“Qarabağ”ın Avstriyada təlim-məşq toplanışında keçirəcəyi yoldaşlıq oyunlarıdakı rəqibləri bəlli olub.
Klubun Mətbuat xidmətinin rəhbəri Gündüz Abbaszadənin İdmanxeber.az-a verdiyi məlumata görə, “köhlən atlar” ilk matçını iyunun 25-də Rumıniyanın “Botoşani” klubuna qarşı keçirəcək. Qarşılaşma Bakı vaxtı ilə saat 17:00-da başlayacaq.
Ağdam təmsilçisi iyunun 29-da isə iki oyuna çıxacaq. Qurban Qurbanovun baş məşqçi olduğu kollektiv saat 12:00-da Almaniyanın “Holştayn”, saat 18:30-da Rumıniyanın “Universitatya Krayova” komandaları ilə üz-üzə gələcək.
Qeyd edək ki, “Qarabağ” UEFA Çempionlar Liqasının I təsnifat mərhələsində Polşa “Lex”i ilə üz-üzə gələcək. İlk görüş iyulun 5-də səfərdə, cavab matçı isə 1 həftə sonra Bakıda olacaq.