UEFA-nın AVRO-2020 öncəsində maraqlı ideyası var. Qurum çempionata ev sahibliyi edəcək 12 fərqli şəhərdə 600 min ağac əkmək istəyir. Bunun şəhərlər üzrə bərabər paylanması planlaşdırılır.
Qurumun prezidenti Aleksandr Çeferin açıqlamasında deyib:
“AVRO-2020 qitənin hər tərəfində keçiriləcək. Bu turnirin fəlsəfəsi mümkün qədər daha az stadion və yol inşasıdı. Ancaq geniş coğrafiya səbəbilə azarkeşlər böyük məsafələr qət etməli olacaqlar. Məsuliyyətimizi dərk edirik. Problem yarada biləcək karbon tullantılarına qarşı nəsə etməliyik. Biz iqlimin qorunmasına yönəlmiş layihələrə yatırım edəcəyik. Bu ölkələrin atmosferində böyük iz buraxacaq 600 min ağac əkməyi planlaşdırırıq”.
Turnirin 60 illiyi münasibətilə Avropa çempionatı 12 fərqli ölkədə keçiriləcək. AVRO-2020-nin qrup mərhələsinin 3, 1/4 finalın 1 matçı Bakı Olimpiya Stadionunda təşkil olunacaq.